Concello de Santiago de Compostela

Saltar a contidos
Utilidades (Saltar):

Idiomas (Saltar):



Portada » Noticias » Noticias
COMERCIO

Castelcan, Pérez Antolín e Seguridade A1, premiados na edición de Nadal do Concurso de Escaparatismo "SCQ Shopping"

Unha imaxe do establecemento gañador, Castelcan.
Ampliar Unha imaxe do establecemento gañador, Castelcan.


Escaparate de Pérez Antolín, segundo clasificado.
Ampliar Escaparate de Pérez Antolín, segundo clasificado.


Seguridade A1 levou o terceiro premio.
Ampliar Seguridade A1 levou o terceiro premio.


Xosé Manuel Iglesias deu a coñecer o nome dos gañadores en rolda de prensa.
Ampliar Xosé Manuel Iglesias deu a coñecer o nome dos gañadores en rolda de prensa.


15/02/2011 O concelleiro de Promoción Económica, Emprego, Comercio e Turismo, Xosé Manuel Iglesias, presentou os comercios gañadores da Edición de Nadal do VII Concurso Municipal de Escaparatismo SCQ Shopping. O primeiro clasificado foi Castelcan, o segundo Pérez Antolín e o terceiro Seguridade A1.

Dirixido a todos os comercios de Santiago de Compostela, o Concurso de Escaparatismo ten como obxectivo contribuír á dinamización e mellora dos establecementos en activo, incentivando a súa capacidade creativa e a súa imaxe. A esta edición de Nadal presentáronse 29 comercios, pertencentes aos sectores da moda e complementos, alimentación, artesanía, óptica, iluminación, fotografía, entre outros.

O establecemento clasificado en primeiro lugar foi Castelcan, unha tenda de venda de animais e especializada en toda clase de produtos e accesorios para eles, situada na rúa de García Prieto, 10. O xurado valorou especialmente a orixinalidade do escaparate, que recrea unha vivenda a través de cuxas fiestras se amosan os seus produtos, os cales son ademais preparados como reclamo de agasallo para as nosas mascotas: peluches, cestiñas para cans e gatos, etc.

O segundo premio logrouno Pérez Antolín, unha tenda de iluminación situada na rúa República Arxentina, 24. O xurado valorou especialmente a ambientación do escaparate. Destaca no mesmo, como eixo central, unha lámina da Catedral. O escaparate, acorde co produto da tenda, xoga coa iluminación e traslada o espectador a un escenario de Nadal de cores nocturnas.

O terceiro premio foi para Seguridade A1, unha tenda especializada en produtos de seguridade, situada tamén na rúa República Arxentina, neste caso no número 29. O xurado valorou especialmente o coidado e sinxeleza na ambientación e integración de elementos típicos do Nadal con produtos da propia tenda tales como alarmas, cámaras de vixilancia ou extintores, elementos a priori non sinxelos de integrar nunha decoración, e máis de Nadal.

Orixinalidade e eficacia
No Concurso, organizado por Promoción Económica e Comercio dende o ano 2004, colaboran a Cámara de Comercio de Santiago de Compostela, a Agrupación de Comerciantes de Santiago ACOTÉS, a Asociación de Comerciantes e Profesionais Centro Comercial Aberto Compostela Monumental, a Fundación Santiago Centro Área Comercial, Euroconsumo Galicia e o Grupo Correo Gallego.

O xurado, reunido o 22 de decembro, está integrado por asociacións de comerciantes, consumidores e expertos na materia. Segundo establecen as bases valora conceptos como a orixinalidade, ambientación e eficacia da mensaxe publicitaria atendendo ás condicións dos establecementos.

O motivo de non dar a coñecer con anterioridade os comercios gañadores estriba en que unha vez que o xurado propón os comercios premiados, o Concello inicia o expediente correspondente tendente a acreditar que cada un dos comercios propostos está ao corrente nas súas débedas con facenda e seguridade social e posúe as licenzas correspondentes. Ditas esixencias figuran nas bases do concurso e veñen impostas pola normativa aplicable, entre outras, a normativa de subvencións.

Voltar


Enviar | Imprimir | Arriba

© 2005, Concello de Santiago. Pazo de Raxoi. Praza do Obradoiro. Tel.: 981 542 300 (Centraliña) 981 542 357 (Alcaldía). Aviso legal