Concello de Santiago de Compostela

Saltar a contidos
Utilidades (Saltar):

Idiomas (Saltar):



Portada » Noticias » Noticias
TURISMO

O Pleno aproba unha transferencia de capital de 200.000 euros para INCOLSA

Oficina de Turismo de Santiago.
Ampliar Oficina de Turismo de Santiago.


03/12/2010 O Pleno da Corporación, en sesión extraordinaria, aprobou unha transferencia de capital de 200.000 euros para Turismo de Santiago – INCOLSA, procedente de remanentes orzamentarios do Concello.

O concelleiro de Turismo, Xosé Manuel Iglesias, indicou que esta transferencia, que incrementa o orzamento ordinario de INCOLSA para 2010, pretende dotar de liquidez á empresa e cumprir coa obriga legal de estabilidade orzamentaria a remate de ano, ao non poder incorporar contablemente os compromisos de convenios que vencen en 2011.

Esta transferencia "supón modificar o orzamento de INCOLSA e dotarnos dunha liquidez de tesourería e, nun futuro, reforzar a estrutura económica da empresa". Así, dixo, "teremos a empresa en equilibrio" mentres non se producen as incorporacións de cartos "dos convenios que vencen o ano que vén". E do mesmo xeito, "cumpriremos co procedemento de estabilidade orzamentaria, que nos obriga a xustificar os gastos a 30 de decembro".

Nestes termos tamén se pronunciou o alcalde, Xosé A. Sánchez Bugallo, segundo o cal esta transferencia resolve un "problema conxuntural de tesourería". Xa cara a formulación dos orzamentos de INCOLSA para 2011, unha vez se materialicen os compromisos pendentes, estas cantidades "incorporaranse como reserva ou ampliación de capital, redundando na solvencia da empresa", engadiu.

Voltar


Enviar | Imprimir | Arriba

© 2005, Concello de Santiago. Pazo de Raxoi. Praza do Obradoiro. Tel.: 981 542 300 (Centraliña) 981 542 357 (Alcaldía). Aviso legal