EDUCACIÓN

Programa Municipal de Conciliación para o Verán

07/06/2015 O 6 de xuño, a Concellería de Educación pechou o prazo de inscrición no Programa Municipal de Conciliación para o Verán 2015, que se desenvolverá no período das vacacións (xuño, xullo e setembro) nas instalacións dos CEIP As Fontiñas e Raíña Fabiola. O prazo de inscrición estará aberto ata o 6 de xuño.

Este programa de conciliación laboral e familiar estará en marcha no período das vacacións do verán 2015, isto é, nos meses de xuño (23, 25, 26, 27 e 30), xullo (do 1 ao 31, agás sábados, domingos e festivos) e setembro (días 1, 2, 3, 4, 5, 8, 9 e 10). Este programa comprende un conxunto de actividades a desenvolver en instalacións do CEIP das Fontiñas e do CEIP Raíña Fabiola, destinadas á poboación escolarizada en educación Infantil e primaria do municipio de Santiago.

O programa quere crear un espazo educativo e de promoción do lecer, ademais de ser un recurso para a conciliación familiar e laboral no tempo de vacacións. Poderán participar nenos e nenas que cursen estudos en centros de educación infantil e primaria de Santiago de Compostela, con idades comprendidas entre os 3 e os 12 anos.

O horario será de 9:00 a 14:00 horas. Non obstante, ofrécese a posibilidade de que as familias soliciten ademais un servizo de madrugadores con almorzo (de 7:45 a 9:00 horas) e un servizo de comedor (de 14:00 a 16:00 horas).

Varias modalidades e prezos
Os pais e nais poden escoller entre diversas modalidades, tanto por número de días como por servizos ofertados.

O prezo depende da modalidade escollida. O custo unitario por día solto é de 2,5 euros para o servizo de madrugadores con almorzo, 8 euros para obradoiros e actividades e 6 euros para o servizo de comedor. No caso de optar por mes completo eses prezos diarios poden reducirse chegando ata os 1,91 euros para o servizo de madrugadores, os 5,22 euros para os obradoiros e os 4,78 euros para o servizo de comedor. Ofrécense unha serie de descontos que van do 20% para familias monoparentais, numerosas ou por dous irmáns no programa; e ata o 50% ou 100% para familias con escasos recursos, para o que será preciso un informe previo do departamento de Servizos Sociais.

O Departamento de Educación facilita as correspondentes follas de matrícula no programa e publica a lista de admitidos e, no seu caso excluídos, nesta web municipal. As admisións realízanse por rigoroso orde de entrada no Rexistro municipal, ata cubrir as prazas dispoñibles.

Compartir: