EDUCACIÓN E CIDADANÍA

Apertura do prazo de matrícula nos servizos de comedor e de madrugadores

05/01/2015 A Concellaría de Educación e Cidadanía comunica a apertura do prazo de matrícula nos servizos de comedor e de madrugadores na rede de centros públicos de educación infantil e primaria do Concello de Santiago para o curso 2016-2017. O prazo estará aberto do 27 de xuño ao 11 de xullo (ambos os dous incluídos).

O impreso de solicitude de matrícula, debidamente cuberto entregarase no Rexistro Xeral do Concello de Santiago (rúa do Presidente Salvador Allende 4, Galeras) ou no Rexistro Auxiliar do Centro Sociocultural do Ensanche (Frei Rosendo Salvado, 14-16, baixo), nos prazos establecidos.

O modelo oficial pode descargarse dende o enlace adxunto nesta web ou solicitalo no Departamento de Educación e Cidadanía (Edificio CERSIA, rúa Alcalde Raimundo López Pol, s/n), así como nos centros de ensino obxecto desta convocatoria.

Os servizos de comedor e madrugadores prestaranse todos os días lectivos do curso escolar, dende o primeiro ata o derradeiro día establecidos no calendario escolar 2016/2017, nos centros docentes sostidos con fondos públicos na Comunidade Autónoma de Galicia, isto é o período comprendido entre o 12 de setembro de 2016 e o 23 de xuño de 2017 (ambos os dous inclusive).

Os colexios que ofertan o servizo de comedor e madrugadores son o Apóstolo Santiago, Cardeal Quiroga Palacios, As Fontiñas, Roxos, Vite, Mestre Rodríguez Xixirei, Monte dos Postes, Raíña Fabiola e Ramón Cabanillas. O CEIP Arquitecto Casas Novoa oferta unicamente o servizo de madrugadores.

Unha vez que se produza a adxudicación do servizo, a Xunta de Goberno Local acordará os prezos por menú a pagar por cada comensal para o curso escolar 2016-2017.

Compartir: