ALCALDÍA

O Concello abordará unha mellora integral das beirarrúas de Fontiñas

12/11/2012 O alcalde compostelán, Ángel Currás, acompañado polo concelleiro de Barrios, Juan de la Fuente, e polos integrantes da Asociación de Veciños O Camiño das Fontiñas, percorreu algunhas das rúas entre os Concheiros e San Lázaro e lindeiras co polígono das Fontiñas.

Esta visita fora un compromiso do alcalde adquirido nunha recente reunión en Raxoi coa asociación veciñal. Ángel Currás puido comprobar de primeira man as deficiencias formuladas polos veciños naquela xuntanza, que afectan fundamentalmente ao mal estado dalgunhas beirarrúas.

O alcalde puido constatar a existencia de zonas de beirarrúas non adaptadas para minusválidos. Así, a propósito dalgún obstáculo observado, referiuse a "actuacións incomprensibles en obras realizadas recentemente". Tamén comprobou a existencia dun tramo mesmo sen beirarrúas, malia terse realizado a cesión do terreo para as mesmas, e doutros tramos con lousado levantado. A situación agrávase máis aínda, dixo, tendo en conta que esta é a porta de entrada do Camiño Francés na cidade.

Á vista desta situación, o rexedor municipal apuntou a necesidade de abordar unha mellora integral das rúas nesta parte da cidade, que o Goberno municipal irá acometendo en función da dispoñibilidade orzamentaria.

Actuacións rematadas na Rocha
Tras esta visita, o alcalde desprazouse ata a Rocha, onde o recibiron os integrantes da Asociación de Veciños Serafín Zas. Con eles puido inspeccionar as obras recentemente rematadas no barrio, nas que se investiron uns 50.000 euros.

Interveuse nas rúas do Veado, Quenlla, Piñeiro e Serafín Zas. Así, mellorouse o pavimento destas rúas e asfaltouse o vieiro que chega ata o Castelo da Rocha Forte. Esta actuación complementouse con outra de Centros Socioculturais, que cambiou as canalizacións de auga para solucionar os problemas de humidades do local sociocultural

Finalmente, o alcalde expresou a súa confianza en que o Ministerio de Cultura consigne en breve a subvención dun millón de euros recollida nos orzamentos do Estado para o acondicionamento e valorización o Castelo da Rocha Forte.

Documentos relacionados



Compartir: