Concello de Santiago de Compostela

Saltar a contidos
Utilidades (Saltar):

Idiomas (Saltar):



Portada » Noticias » Noticias
ALCALDÍA

A Deputación achega á cidade de Santiago inversións por un total de 1,2 millóns de euros

O alcalde e o presidente da Deputación asinaron tres convenios
Ampliar O alcalde e o presidente da Deputación asinaron tres convenios


Os dous politícos compareceron en rolda de prensa para dar conta dos asuntos tratados
Ampliar Os dous politícos compareceron en rolda de prensa para dar conta dos asuntos tratados


Diego Calvo asinou no libro de honra
Ampliar Diego Calvo asinou no libro de honra


Na xuntanza, abordaron temas a maiores dos convenios
Ampliar Na xuntanza, abordaron temas a maiores dos convenios


02/11/2011 O alcalde de Santiago, Xerardo Conde Roa, e o presidente da Deputación da Coruña mantiveron unha reunión de traballo na que foi a primeira visita institucional de Diego Calvo a Compostela e na que, ademais, se asinaron tres convenios para a promoción de distintas accións na cidade que ascenden a 480.000 euros. A maiores o ente provincial investirá 600.000 no Plan de Obras e Servizos e 150.000 no Fórum Gastronómico.

En dous destes acordos, destinados á promoción do turismo na área compostelá, a Deputación investirá 450.000 euros, dos cales 350.000 se destinarán ao financiamento do Plan de Competitividade Turística do Concello e 100.000 recibiraos a Asociación de Empresarios de Restauración e Hospedaxe para o seu proxecto "O Camiño Inglés para comelo, un camiño por descubrir".

O primeiro dos convenios, asinado por Diego Calvo e o alcalde da cidade, Xerardo Conde Roia, ten por obxecto a colaboración en todo o programa de actividades a desenvolver dentro do Plan de Competividade Turística. Inclúense aquí accións encamiñadas á promoción da cidade (congresos, feiras ou presentacións), á posta en marcha de diferentes paquetes turísticos ou ao investimento en publicacións tanto impresas como dixitais. En total, o orzamento destas actividades é de 437.500 euros, dos cales o 80% (un total de 350.000 euros) serán achegados directamente pola institución provincial e o resto polo Concello.

Non acaba aquí a colaboración da Deputación Provincial coa promoción turística na cidade, xa que Diego Calvo tamén asinou un convenio de colaboración coa Asociación Provincial de Empresarios de Restauración e Hospedaxe de Santiago para financiar o proxecto de desestacionalización turística. O obxecto deste acordo é contribuír ao financiamento das actividades desta entidade, orzamentadas en 125.000 euros dos cales 100.000 serán achegados pola institución provincial.

Entre as actividades que contribuirá a custear a Deputación están diferentes accións promocionais do Camiño Inglés, como a organización dunha peregrinación conxunta no outono, a reedición dunha guía multimedia da ruta ou unhas xornadas gastronómicas e históricas do Camiño a celebrar durante o inverno.

Erradicación do chabolismo
Diego Calvo e Xerardo Conde Roia tamén asinaron esta mañá no Pazo de Raxoi un convenio de colaboración para financiar o programa municipal de erradicación do chabolismo e as infravivendas como expresión de marxinalidade na provincia.

A Deputación achegará un total de 30.000 euros para colaborar na retribución do persoal que traballa nos programas postos en marcha desde o Concello para a inclusión residencial da comunidade xitana ou usuaria de infravivendas que se atope actualmente inmersa nun proceso de reacollo ou rehabilitación.

Plan de Obras e Servizos e Fórum Gastronómico
Ademais de asinar o tres convenios de colaboración, a reunión entre Diego Calvo e o alcalde santiagués tamén serviu para que ambos falasen dalgúns proxectos pendentes e, entre outras cuestións, falaron da achega do Plan de Obras e Servizos da Deputación en Santiago, que ascende a 600.000 euros, e da colaboración na próximo edición do Fórum Gastronómico, que será de 150.000 euros.

O alcalde compostelán agradeceu profundamente a colaboración da Deputación da Coruña xa que o feito de que "faga este esforzo ten un significado especial dadas as dificultades orzamentarias do Concello". Segundo Conde Roa as achegas do ente provincial, que ascenden a 1.200.000 euros, son unha "demostración do compromiso da Deputación e do seu presidente coa cidade de Santiago". Pola súa banda, Diego Calvo declarou estar "especialmente satisfeito da firma destes convenios, sobre todo porque un deles contribuirá a algo moi importante, que é a desestacionalización do turismo en Santiago, un dos puntos máis importantes deste sector en Galicia", e engadiu que, no futuro, a colaboración co Concello de Santiago seguirá sendo "moi activa".

Parque de Bombeiros
Preguntado na comparecencia antes os medios sobre o parque de bombeiros, o rexedor compostelán indicou que o Concello vai retomar o asunto para darlle unha "solución racional". Segundo Conde Roa, é urxente buscar unha saída para o edificio paralizado en Salgueiriños; "se pode ser como parque comarcal de bombeiros, excelente, e senón haberá que buscar outra solución, por exemplo como parque municipal de Santiago". De tódolos xeitos, o alcalde sinalou que é unha cuestión que depende das dotacións orzamentarias do Concello, Deputación e Xunta de Galicia.
Documentos relacionados

Voltar


A miña compostela

Pon esta web máis cómoda, máis rápida, máis ao teu xeito.

Axenda


Enviar | Imprimir | Arriba

© 2005, Concello de Santiago. Pazo de Raxoi. Praza do Obradoiro. Tel.: 981 542 300 (Centraliña) 981 542 357 (Alcaldía). Aviso legal