CIDADE HISTÓRICA

O programa Compostela Medieval achegará a historia de Santiago aos máis pequenos

06/10/2009 A concelleira de Rehabilitación e Cidade Histórica, Olga Pedreira, presentou o novo programa Compostela Medieval, que busca achegar a veciñanza á historia da cidade. Está dirixido ao alumnado do terceiro ciclo de primaria e consiste nun conxunto de actividades encamiñadas a que os nenos e as nenas participantes "visualicen" Compostela como a máis antiga das cidades medievais de Galicia, mesmo de Europa, destino de peregrinos, comerciantes e artesáns das máis diversas procedencias.

Compostela Medieval céntrase nesta etapa histórica na que Compostela acada a súa madurez, social, económica, institucional e cultural da man dun poderoso episcopado e dunha rebelde burguesía. Principia cunha visita guiada e participativa de dúas horas e media de duración pola Cidade Histórica. Durante o percorrido descubrirán como era a cidade e como vivían os seus habitantes na Idade Media. Para esta descuberta Terceira Persoa, empresa encargada de levar a cabo a actividade, baséase nas numerosas pegadas históricas (a cerca da cidade, os espazos públicos, a toponimia.....) que podemos encontrar en Compostela.

No decurso desta visita guiada, os participantes asistirán a escenificacións de personaxes e situacións históricas e, para iso empregaranse documentos adaptados procedentes do Libro do Concello de Santiago (1416-1422) conservado no Arquivo Universitario, como por exemplo o documento do xuramento de dous alcaldes ou xuíces no mosteiro de San Paio de Antealtares; o pregón coas medidas e prezos dos produtos dos mercados segundo as ordenanzas do concello; ou a orde do concello de pechar as portas da muralla. Rematado este percorrido, os nenos e nenas participantes completarán un caderno de viaxe para asentar os coñecementos adquiridos, caderno que xunto co que se distribuirá tamén entre o profesorado servirá para seguir traballando o tema nas aulas.

Compostela Medieval é un programa aberto a todos os centros de ensino de Compostela que se vai desenvolver do 26 de outubro ao 13 de novembro. Os centros interesados teñen que cubrir e enviar por fax ou correo electrónico a súa solicitude indicando as datas nas que queren realizar a visita guiada e o número de participantes (máximo de 25 por grupo).

Nesta visita guiada os rapaces percorrerán, entre outros, os seguintes lugares:

o Porta do Camiño. É a principal porta de entrada á cidade de peregrinos e mercadorías. Coñeceremos as funcións da muralla e das portas.
o Rúa Entremuros. Veremos un lenzo conservado da muralla.
o Algalia de Abaixo (nome medieval: Algara de Fondo). Veremos unha tipoloxía de casa e trataremos o aspecto das rúas.
o Praza de Cervantes (Praza do Campo). Era a praza comercial máis importante na Idade Media. Nela, o concello expoñía os prezos e medidas oficiais dos produtos e mercadorías para evitar fraudes.
o Praza da Inmaculada (Praza do Paraíso). Era a porta da catedral por onde entraban os peregrinos. Neste espazo traballaban moitos profesionais relacionados co atención aos peregrinos: acibecheiros, concheiros, albergueiros, cambiadores.
o Praza do Obradoiro. Diante do pazo de Xelmírez falaremos sobre o señorío da cidade e o continuo enfrontamento entre este e os cidadáns e cidadás representados polo concello. Coñeceremos a importancia de Santiago como sé eclesiástica do Reino de Galicia. Descubriremos o aspecto da catedral románica e o desenvolvemento acadado polos oficios relacionados coa construción grazas á construción do templo románico e do resto de igrexas e elementos urbanísticos da cidade.
o Praterías (praza dos Ourives). Nesta praza estaban as tendas dos ourives (os prateiros) e os postos do peixe (o de peixeira era un oficio de muller). Poderemos ver a portada románica de entrada á catedral.
o Praza da Quintana. Foi un cemiterio de clérigos e persoas importantes da cidade e a praza pública principal da cidade nos s. XIV e XV. No mosteiro de Antealtares celebrábase o nomeamento de alcaldes ou xuíces do concello que dependía do arcebispo.
o Rúa Nova. Veremos a igrexa medieval de Santa María Salomé e dous exemplos de casas medievais con soportais. Trataremos as funcións das casas: o espazo de traballo na parte baixa (tenda ou obradoiro) e a vivenda na planta superior.
o Praza e porta de Mazarelos. Pola porta entraban os peregrinos da Vía da Prata e diferentes mercadorías como cereais de Castela e viño do Ulla e do Ribeiro. A praza era un importante espazo comercial onde se vendían eses produtos e mais as verduras. A porta de Mazarelos é a única porta da muralla que conservamos e a segunda en importancia en época medieval. A burguesía compostelá estaba dirixida por comerciantes

Documentos relacionados



Compartir: