PARQUES E XARDÍNS

O CIPX ofrece roteiros guiados e obradoiros aos centros educativos

18/09/2019 Neste novo curso académico 2019-2020, o Centro de Información Municipal de Parques e Xardíns (CIPX) do parque de Belvís, en colaboración co Departamento de Parques e Xardíns do Concello de Santiago de Compostela e Ferrovial Servicios, continúa a desenvolver o seu programa de sensibilización ambiental cunha oferta de actividades para os centros educativos composteláns.

Entre estas actividades nas zonas verdes da cidade, están os roteiros guiados, que tanto éxito teñen ano tras ano, xa que axudan a mellorar o coñecemento da contorna natural entre o alumnado, e así sensibilizar sobre o seu valor e a importancia da súa conservación.

Tamén se ofertan, para o alumnado de Primaria, uns obradoiros a realizar no CIPX de Belvís, dende as 10:00 ata as 13:30 horas, e que contan co desprazamento incluído. Nestes obradoiros, que xa se realizaron na pasada primavera, trátase o tema da biodiversidade espontánea como reduto de biodiversidade urbana.

Pódese obter máis información e inscribirse nas actividades a través da dirección de correo electrónico ilopez@gmail.com ou do teléfono 661 406 965.

Direccións relacionadas



Compartir: