TURISMO

Santiago de Compostela promociónase como destino de congresos no Iberian Mice

26/10/2018 O Santiago de Compostela Convention Bureau (SCCB), servizo de Turismo de Santiago para a promoción como destino de Congresos, Xornadas e Incentivos, participa entre o 25 e o 27 de outubro no Iberian Mice, que se celebra en Braga.

O Iberian Mice é evento máis importante que se celebra na Península Ibérica dirixido exclusivamente a profesionais do sector portugueses e españois. O encontro ten como obxectivo facilitar os contactos profesionais e o intercambio de oportunidades de negocio entre compradores da Península e provedores e destinos relacionados co turismo de congresos e reunións de España e Portugal.

O programa combina as sesións de reunións persoais preestablecidas cun intenso programa social para favorecer a relación entre compradores e vendedores. O SCCB participa na evento con preto de 30 reunións xa definidas con profesionais que amosaron interese en coñecer as posibilidades que ofrece Santiago como destino de congresos.

O ano 2018 continúa coa tendencia positiva no sector congresual que comezou hai un par de anos. Neste ano estanse celebrando importantes eventos e congresos, que dinamizan o sector en diferentes momentos do ano. Só entre os seis principais congresos e eventos deste ano chegarán a Santiago máis de 6.000 participantes.

Os principais eventos deste 2018 son: Campionato do Mundo de Xadrez Infantil, que se celebrará do 3 ao 18 de novembro e ao que asistirán unhas 3.000 persoas, cun impacto económico estimado duns cinco millóns de euros; XXXV Congreso Nacional de Enfermería de Saúde Mental; Prion 2018 (congreso internacional do sector da medicina molecular); EDF Congress 2018 (congreso dos produtores lácteos europeos); 49 Congreso Nacional de Podoloxía; e V Congreso Nacional de Áridos.

A previsión é que esta tendencia positiva mellorará incluso no 2019, no que xa están confirmados cinco congresos médicos de máis de 1.000 participantes e outros tres congresos de máis de 500 participantes que se celebrarán no primeiro cuadrimestre, fomentando a desestacionalización da demanda, e outros tres congresos europeos que terán entre 300 e 800 participantes.

Compartir: