IGUALDADE

Minuto de silencio polas últimas vítimas mortais da violencia machista

20/08/2018 A praza do Obradoiro acolleu este mediodía un minuto de silencio para condenar os asasinatos machistas acontecidos nos últimos días, un deles no municipio coruñés de Cabana de Bergantiños.

A alcaldesa en funcións, María Rozas, e outros membros da Corporación sumáronse a este acto, para lembrar ás mulleres asasinadas onte en Cabana de Bergantiños e o pasado día 14 na localidade granadina de Dúrcal. Deste xeito, dáselle cumprimento á moción aprobada por unanimidade no Pleno da Corporación do 7 de setembro de 2015, que fixa accións de dó e solidariedade por cada asasinato machista.

O asasinato de onte en Cabana de Bergantiños eleva a tres as vítimas mortais da violencia machista en Galicia no que levamos de ano. A violencia de xénero é a expresión máis extrema da desigualdade social que sofren as mulleres, e estes asasinatos prodúcense porque a violencia segue sendo utilizada como un mecanismo de control e dominación das mulleres. O Goberno municipal e o conxunto da Corporación condenan firmemente a violencia de xénero, e queren amosar a súa máxima solidariedade coas familias de todas as mulleres asasinadas.

Compartir: