PATRIMONIO

Últimas semanas para participar no segundo Certame de Creación Audiovisual para Mozos/as

07/05/2018 O 1 de xuño rematará o prazo para participar no II Certame de Creación Audiovisual para Mozos/as "A miña cidade é patrimonio de todos", que organiza o Grupo de Cidades Patrimonio da Humanidade de España. Este programa enmárcase na celebración ao longo deste 2018 do 25 aniversario da constitución do Grupo.

Un dos obxectivos prioritarios para o GCPHE é difundir entre os máis novos o valor deste patrimonio cultural que se atopa na súa contorna, así como a necesidade de colaborar na súa preservación e mantemento. Por este motivo, e neste ano 2018 no que España e o resto do países da Unión Europea celebran o Ano Europeo do Patrimonio Cultural, o GCPHE convoca a segunda edición do seu Certame Audiovisual dirixido a mozos/as de entre 16 e 30 anos, co que quere, ademais de propiciar un maior coñecemento e sensibilización cara ás 15 Cidades Patrimonio, potenciar o uso das novas tecnoloxías, desenvolver a creatividade no campo da imaxe e estimular a capacidade de observación da contorna da cidade.

Establécense dúas categorías de participación: mozos de idades entre 16 e 18 anos, que deberán presentar a súa obras no centro xuvenil/concellería de Mocidade dalgunha das 15 cidades que forman o Grupo, e mozos de entre 19 e 30 anos, que directamente se inscribirán no certame a través da páxina web www.ciudadespatrimonio.org. O prazo de participación ábrese este mesmo martes e pecharase o 1 de xuño de 2018.

Esta actividade desenvólvese no seo da Comisión de Patrimonio e Cidade do Grupo, que é o órgano encargado da xestión dos proxectos relativos á defensa, conservación e divulgación do patrimonio cultural que atesouran as 15 cidades que forman a rede. Dentro desta área destacan os programas levados a cabo e relacionados co medio ambiente, o urbanismo, a arqueoloxía, a seguridade ou a vertente pedagóxica do patrimonio. Todos os proxectos de Grupo neste campo contan coa colaboración do Ministerio de Educación, Cultura e Deporte, a través da Subdirección Xeral de Protección do Patrimonio Histórico.

Direcciones relacionadas



Compartir: