ALCALDÍA

O alcalde reclama solucións ao conflito da xustiza

27/02/2018 O alcalde recibiu esta mañá aos representantes do comité de folga do sector da xustiza, para expresar a súa solidariedade coas súas demandas e reclamar solucións "a un conflito que lle está a afectar ao día a día da veciñanza de Compostela". En Santiago estanse a suspender entre 30 e 40 xuízos diarios dende que se iniciou o paro indefinido dos funcionarios xudiciais, o pasado 7 de febreiro.

Martiño Noriega recoñeceu o importante impacto que está a ter a folga en Santiago, e apelou aos responsables políticos da Xunta a que "busquen solucións, que non pasan pola criminalización dos traballadores da xustiza nin das súas reivindicacións lexítimas".

A reunión foi solicitada polo comité de folga, no que están representados sete sindicatos. Un dos seus voceiros, Manuel Díaz, explicou que o obxectivo da xuntanza era "darlle visibilidade ao conflito e mostrarlle ao alcalde os graves prexuízos que está a causar para a cidadanía de Compostela". Nesa liña, incidiu en que "o seguimento do paro en Santiago está a ser do 80%, e polo tanto están afectados moi notablemente o rexistro civil e máis a celebración de vistas".

Compartir: