CONSORCIO

Alumnos da Escola de Altos Estudos Musicais ofrecen este mércores un novo concerto no Paraninfo da Universidade de Santiago

26/05/2015 A Escola de Altos Estudos Musicais (EAEM) ten en marcha a iniciativa A Escola na Cidade, un ciclo de concertos de música de cámara interpretados polos alumnos do Curso Avanzado de Especialización Orquestral do centro. As entradas destas actuacións son gratuítas ata completar aforo.

No marco deste programa, este mércores 27 de maio, ás 20:00 horas, os rapaces ofrecerán un novo concerto no Paraninfo da Universidade de Santiago, na Facultade de Xeografía e Historia.

En primeiro lugar actuará a oboísta Marta Varela, que interpretará o Concerto para óboe do compositor e director de orquestra alemán Richard Strauss. Estará acompañada pola pianista Eriko Ishimoto.

A cita musical concluirá coa actuación da violoncellista Milagros García. Achegará ao público dúas obras. Por un lado, tocará parte do Concerto para violoncello de Haydn. Ademais, interpretará a Elexía do compositor francés Gabriel Fauré. Nesta ocasión a músico contará co acompañamento ao piano de Haruna Takebe.

Compartir: