ECONOMÍA

O concurso de promoción da cultura emprendedora entre estudantes "Desafío SCQ" abre o prazo de inscrición

18/03/2015 A Concellería de Economía convoca, no marco do programa Santiago Investors Support, o concurso Desafio SCQ, co fin de fomentar a cultura emprendedora entro os estudantes e xerar vínculos entre estes e empresas do Concello de Santiago de Compostela. A convocatoria do concurso está aberta a todo o alumando de 3º e 4º da ESO, Bacharelato e Formación Profesional de Santiago, que conformen un grupo de catro ou cinco membros, titorizados por un docente do seu centro para desenvolver un dos desafíos propostos.

As solicitudes de participación deberán realizarse mediante o envío debidamente cumprimentado do formulario de inscrición, que poderá descargarse na web do
CERSIA, ao correo electrónico desafioscq@santiagodecompostela.gal ata o 27 de marzo. Cada docente pode titorizar a máis dun grupo. Os membros dos grupos gañadores serán premiados cunha tableta dixital cada un, e o centro educativo ao que estean vencellados, un ordenador portátil.

Aos equipos participantes remitiráselles un listado de posibles desafíos empresariais para que cada grupo escolla un deles e presente unha solución ao mesmo. A organización do concurso escollerá como máximo seis grupos finalistas que prepararán a súa presentación pública para o acto final do concurso que se celebrará na primeira semana do mes de xuño en Santiago de Compostela.

Un xurado composto por representantes das concellerías de Educación e de Economía e entidades empresariais de Santiago de Compostela escollerá a proposta gañadora en cada unha das tres categorías do Concurso: Solución máis innovadora, Solución máis social e Solución mellor presentada. As bases completas do concurso, así como o formulario de inscrición, está dispoñibles na web do CERSIA.

A concelleira de Economía, Reyes Leis, presentou en rolda de prensa este concurso Desafío SCQ, unha das actividades do programa Santiago Investors Support, que naceu a finais do ano 2011 e ten tres obxectivos fundamentais: impulso e mellora da competitividade empresarial e comercial; proxección exterior e captación de investimentos; posta en valor e dinamización da actividade económica.

Direccións relacionadas



Compartir: