PORTAL MUNICIPAL

O portal do Concello, entre as dez mellores webs municipais de España

14/07/2006 A páxina do Concello de Santiago é unha das dez mellores webs municipais de España, segundo a "VI Radiografía de webs municipais" realizada polo xornal El País. O portal de Compostela sitúase no oitavo posto da lista, ascendendo trece postos respecto á cualificación do pasado ano. A de Santiago é a mellor páxina entre as galegas e recibe cada mes unha media de 65.000 visitas. O informe valóraa como "moi útil".

O estudio destaca da web aspectos como a posibilidade de descargar impresos e facer trámites e pagos en liña, a dispoñibilidade dunha carpeta cidadá, o rueiro, a opción de coñecer as liñas de transporte ou o funcionamento do buscador e do mapa web. Outro dos aspectos valorados, ademais da actualización diaria da páxina, é o acceso dos cidadáns aos blogs. Nesta liña o Concello puxo en marcha "Cadernos Composteláns", unha plataforma de cadernos de bitácora para que os veciños da cidade teñan o seu propio espazo de expresión.

A web de Santiago tamén resultou moi ben parada no test de accesibilidade. Neste sentido, unicamente 12 concellos, e entre eles Santiago, cumpren coa lei que obriga á accesibilidade das páxinas web das administracións públicas.

Direccións relacionadas



Compartir: