Jueves 22 de enero 2015

Axenda

"Espazos compartidos. Cines e vidas", mostra fotográfica de Compostela Cine Classics

Unha exposición conformada por 15 fotografías seleccionadas das concorrentes no concurso promovido pola edición deste ano do Compostela Cine Classics, pecha a programación sociocultural deste proxecto,

A exposición recolle as impresións dos distintos autores sobre o cine nas súas vidas, os seus recordos e o que o cine representa para eles. Os traballos seleccionados son os seguintes: "Voltaremos", de José Alberto Pedrido Guldrís; "Días de choiva", de Ana Valado; "Personaxe misteriosa", de José Alberto Pedrido Guldrís; "Novembro en Compostela" de María Munín González; "Outro Cinema Paradiso", de Jorge Juan; "Redescubrindo a Sala Yago", de Yolanda Atararxia; "Fuga en vermello", de Javier Grixo; "Godard", de Ana Gontad; "I love cine", de Peibol; "Safety curtain", de Valeria; "A taquilla do Colón", de Tania F.; "Con faldas y a lo loco en San Martiño Pinario", de María Munín González; "A derradeira carteleira dos cines Valle-Inclán", de María Munín Gonzalez; "Primer plano", de José Mª Lamas; e "Expo cine", de Lora B.

Do 15 de xaneiro ao 12 de febreiro no Centro Sociocultural e Xuvenil Municipal do Ensanche.

Axenda

"Lo real", intervención de María Castellanos Vicente na Zona C

María Castellanos Vicente (Xixón, 1985), indaga en Lo real acerca da percepción. Formalmente, concibe unha instalación cunha parede chea de espellos aparentemente normais e sitúa no centro da sala un monitor no que o público se vai atopar coa cita do filósofo francés Jean Baudrillard: "O real xa non é aquilo que se pode reproducir, senón o reproducido’. A frase só se pode ver a través do monitor, que reproduce a tempo real o que unha cámara situada na sala está a capturar".

Ata o domingo 1 de febreiro, na Zona C.

Máis información: Compostela Capital Cultural

Axenda

Xulio Maside

Unha exposición que reivindica a figura de Xulio Maside no contexto da historia da arte en Galicia das últimas décadas. Aínda que nacido en Vigo en 1933, Xulio Maside vive en Compostela, na casa familiar da rúa do Vilar, cando era un neno e alí convive con Carlos Maside, o seu tío e figura imprescindible da arte. Seguro que de aí nace a súa inquietude e curiosidade pola arte.

Ata o 8 de febreiro, no Auditorio de Galicia.

Máis información: Compostela Capital Cultural

Axenda

"Maside en Compostela. O testamento pictórico do mestre"

Exponse na Fundación Novacaixagalicia Maside en Compostela. O testamento pictórico do mestre, un proxecto no que colaboran o Concello de Santiago, a familia de Carlos Maside e a devandita Fundación. A través de 31 obras de diversas temáticas, e realizadas con diferentes técnicas que van dende o óleo ata a acuarela, pasando pola tinta china sobre pergameo, o proxecto expositivo presenta un percorrido pola obra e vida deste artista de traxectoria singular que se converteu no principal referente ideolóxico da xeración dos renovadores.

Ata o 31 agosto de 2015, en horario de luns a domingo de 12:00 a 14:00 e de 17:00 a 21:00 horas, no Centro Cultural da Fundación Novacaixagalicia.

Axenda

"O amor dos infelizes", por Teatro Bruto de Porto

O amor dos infelizes constrúese a partir dunha adaptación escénica do segundo capítulo do romance O filho de mil homens, de Valter Hugo Mãe. Margarida Gonçalves incorpora aquí a figura dunha enana, explorando territorios, entre a personaxe e o seu narrador, onde é espectadora de si mesma e dos acontecementos da historia que narra… A historia dunha muller de apenas oitenta centímetros de altura, chea de dores, que vivía á sombra da piedade dos habitantes dunha pequena vila do interior que a vían como unha nena que nunca creceu.

O xoves 22 de xaneiro, ás 20:30 horas, no Salón Teatro.

Máis información: Compostela Capital Cultural

Axenda

Manuel Hernández Silva e Amaury Coeytaux coa RFG

Schumann asume protagonismo durante dúas semanas consecutivas con senllas obras de madurez do "melancólico"gran mestre do Romanticismo. A última das súas catro sinfonías, rebautizada como "Renana" e que para moitos ten como referencia a Beethoven e a súa Quinta Sinfonía, culmina un concerto que ten outro poderoso foco digno de atención no terceiro e último concerto para violín que o francés Saint-Saëns dedicou ao virtuoso navarro Pablo de Sarasate.

O xoves 22 de xaneiro, ás 21:00 horas, no Auditorio de Galicia.

Máis información: Compostela Capital Cultural

Compartir: