Concello de Santiago de Compostela

Promoción Económica

O apoio e promoción de proxectos de autoemprego e de cooperativas de mozos e mozas prestando asesoramento informativo e xurídico e mediante axudas económicas ás iniciativas xuvenís de creación de emprego, a potenciación dos viveiros de empresas ou o estudo da situación laboral da mocidade mediante a posta en marcha dun Observatorio Municipal que recolla datos sobre a evolución do emprego e elabore propostas para axeitar a formación á demanda son algunhas das iniciativas da Concellaría de Promoción Económica, Emprego, Comercio e Mercados.

Emprego

No tocante a esta materia o Concello mantense en estreita colaboración co organismo autonómico de política de emprego, o Servizo Galego de Colocación. Así mesmo, Santiago participa a este nivel do Plan Labora de promoción do emprego e ofrece ao longo de todo o ano cursos e programas de formación ocupacional e continua.

Dous dos proxectos do Concello de Santiago para favorecer a inserción laboral son o Proxecto Crear e o Proxecto Persoa. Este último procura a integración laboral a través dos novos xacementos de emprego artellando a través dun proceso de formación específica que inclúe a realización de prácticas titorizadas. Pola súa parte, o Proxecto Crear é un programa experimental no que están a participar 75 candidatos seleccionados a través do Servizo Galego de Colocación.

Comercio

Este é un sector fundamental dentro da economía compostelana e, polo tanto, o goberno municipal centra os seus esforzos na configuración de programas de promoción comercial, a través de convenio coas asociacións de comerciantes do concello. Un dos proxectos máis recentes foi a dinamización comercial da Praza Roxa, que incluíu a remodelación arquitectónica da propia praza, a convocatoria dun premio de escaparatismo e a instalación dunha carpa para celebrar a súa apertura.

A tarefa da delegación de Comercio non pode levarse a cabo sen ter en conta un traballo man a man coas asociacións que representan o pequeno comercio tradicional: Centro Comercial Aberto Compostela Monumental, Área Comercial Santiago Centro e Agrupación de Comerciantes de Santiago (Acotes), así como as grandes áreas comerciais: Área Central e Centro Comercial Compostela.

Turismo

A Concellaría de Turismo de Compostela atende os visitantes que se achegan á cidade pola súa condición de capital europea, os peregrinos que realizan o Camiño de Santiago e que visitan Compostela non só durante o Ano Xacobeo, e a todas as persoas que se veñen á nosa cidade convocadas por congresos e eventos culturais.

Para atender estas necesidades, a Concellaría xestiona un Plan de Excelencia Turística. En 1999 o concello creou unha empresa municipal, Incolsa, dedicada especificamente á promoción turística da cidade.